भोला संग लड़े बर भीड़ गे

अंजनी के बेटा अंजनी के बेटा 2 हावै गा बलवान

भोला संग लड़े बर भीड़ गे वीर बली हनुमान

वीर मणी एक राजा रहिस हे शिव के भारी पुजारी गा

शिव के पूजा करे वो निशदिन सुनौ सुनौ संगवारी गा

परसन हो के देईस दर्शन ओला डमरू धारी गा

भगत के मया म बंध के भगवन करे हावै रखवारी गा

अपन भगत के अपन भगत के 2 रक्षा करे हे भगवान

भोला संग लड़े बर भीड़ गे वीर बली हनुमान 2

रामचन्द्र तब उही समय म यज्ञ ल हावै रचाए गा

छोड़ै घोड़ा अश्वमेघ के पाती ला हावै लिखाए गा

जउन हा ऐ घोड़ा ला पकड़ही युद्ध ला उही मचाए गा

नई तो अर्धनी रइही मोर वो अइसे हावै चेताए गा

जेहर छेके ये घोड़ा ला 2 होही लहू लुहान

भोला संग लड़े बर भीड़ गे वीर बली हनुमान 2

युद्ध हा मच गे दूनो दल म लहू बोहाऐ तर तर गा

अस्तर शस्तर चले हे रण म कतको जाए मर हर गा

अपन भगत के सेवा करे बर आगे तब शिव शंकर गा

त्रिशुल उठाए उही करा वो बन गे ओहर भयंकर गा

माते लड़ाई 2 शिव बजरंग के कईथे वेद पुराण

भोला संग लड़े बर भीड़ गे वीर बली हनुमान 2

भगत के लाज रखे बर भोला करे हावै लड़ाई गा

छै बेर बजरंगी पटगिस कटगे दुख के काई गा

रथ हर टूटगे शिव शंकर के करे हावै सहाई गा

आशीष देके सहराए हे होही जग में बड़ाई गा

अईसे किसम के 2 होईस लड़ाई प्रेम करे गुणगान

भोला संग लड़े बर भीड़ गे वीर बली हनुमान 2

अंजनी के बेटा अंजनी के बेटा 2 हावै गा बलवान

भोला संग लड़े बर भीड़ गे वीर बली हनुमान 2 ||2||