बालोद के तीर मा हावै तोर गांव

झलमला मा बइठे तै गंगा मैया तोरे नाव

गंगा मैया तोरे नाव

ऐ दे बालोद के तीर मा हावै तोर गांव

बालोद के तीर मा हावै तोर गांव

झलमला म बईठे तै

झलमला म बईठ गंगा मैया तोरे नाव

बालोद के

बालोद के तीर मा हावै तोरे गांव

एक दिन निषाद राज पहातिन कुन आईस

सरवर तरिया म अपन साफी ला घूमाईस

आ..............

जब जब साफी घूमाईस पखरा एक पाईस

वो पखरा ला निषाद राज पानी भीतर डारिस

भेद नई तो जाने वो

भेद नई तो जाने रहे माता के पास

बालोद के

बालोद के तीर मा हावै तोर गांव

पानी भीतर बुड़ के वो पखरा ला निकाले

एक तीर रद्दा म पखरा ला बईठाले

आ..............

पखरा ला देवी मा लगाये रंग गुलाले

गांव भर के नर नारी लाली चुनरी डाले

चिरई चिरगुन गाये

चिरई चिरगुन गाये कौआ करे कांव

बालोद के

बालोद के तीर मा हावै तोर गांव

उही दिन ले माता जी के शरण मा सब आथे

मन के मनौती मना श्रद्धा के फूल चढा़थे

आ............

चईत अउ कुंआर मे सुग्घर मेला भराथे

तीरथ कोसरिया संगम गाला मा संवाथे

महिमा नई तो जानौ मै

महिमा नई तो जानौ कपि काला मै बतावव

बालोद के तीर मा हावै तोर गांव

झलमला म बईठे तै गंगा मैया तोर नाव

जय गंगा मैया झलमला के गंगा मैया

जय गंगा मैया झलमला के गंगा मैया